ललितपुरको चाकुपाट निवासी श्री बेखा महर्जनज्यू काठमाडौंमा पहिलो क्याटरिङ् व्यवसाय सुरु गर्नेहरु मध्यका एक हुनुहुन्थ्यो । नेपालकै पहिलो होटल, होटल रोयल, बहादुर भवनमा वि.स. २०१० देखि २०१५ सालसम्म सहायक कुक र वि.स. २०१५ सालदेखि २०२५ सालसम्म हेड कुक भई वरिष्ठ रसियन सेफ बोरिस लिशनविचसँग काम गर्नुभयो । यसै गरी वि.स. २०२७ साल देखि वि.स. २०३४ सालसम्म होटल माउण्ट मकालु, धर्मपथ न्यूराडमा हेड कुकको रुपमा काम गर्नु भयो । त्यस पछि वि.स. २०३५ साल तिर लाजिम्पाट स्थित होटल लालिगुराँसमा किचेन चलाउनु भयो । उहाँ त्यस बेला आफूनो अनुभवको आधारमा होटलमा छुट्टी मिलाएर काठमाडौं उपत्यकाका ठूला घराना शाहुहरुको भोज भतेरमा घरमा गएर कुकको रुपमा काम गर्नुका साथै कुकिङ्ग गर्न पनि जानु हुन्थ्यो ।

वि.स. २०३८ साल तिर कान्तिपथ स्थित होटल प्याराडाइजमा किचेन चलाउनु भयो र त्यसै बेला ठूला घराना शाहुहरुले काठमाडौँ टेण्ट हाउसबाट टेण्ट, मेच तथा सहयोग समिति र मुन्चा हाउसबाट प्लेट, गिलास, चम्चा, भाडाकुड ल्याएर पार्टी चलाउने समयमा उहाँ घर टोलहरुमा गई कुकिङ् गेरर पार्टी चलाउनु हुन्थ्यो । यसै गरि बिस्तारै आफैले भेन्यू हाउस, काठमाडौँ टेण्ट हाउस र सहयोग समितिबाट सामान रेण्टमा लिएर हाफ क्याटरिङ चलाउनु भयो । यसरी अघोषित रुपमा क्याटरिङ सञ्चालन हुन थाल्यो । उहाँका तीन छोरा तुल्सी, मन्तु, राजु हुन् । वि.स. २०४० सालतिर जेठा छोरा तुल्सी महर्जनको सहयोगमा उहाँले नाम राखि आफ्नै लगानीमा क्याटरिङ व्यवसाय सुरु गर्नु भयो । त्यस हिसाबले बेखा क्याटरिङ् ललितपुर जिल्लाको पहिलो क्याटरिङ तथा काठमाडौंको दोस्रो क्याटरिङ हो ।

उहाँको क्याटरिङ यति चल्थ्यो कि सिजनमा हरेक दिन ३, ४ वटा क्याटरिङ हुन्थ्यो, त्यसैले उहाँका छोराहरुले समेत उहाँको व्यवसायमा साथ दिन थाल्नुभयो । यसै क्रममा वि.स. २०५१ सालमा उहाँका माइला छोरा मन्तु महर्जनले न्यूरोड स्थित जोसी सपिङ्ग सेन्टरमा पार्टी प्यालेस संचालन गर्नु भयो । यसै गरि उहाँका कान्छा छोरा राजु महर्जनले वि.स. २०५६ देखि २०६३ सालसम्म छेत्रपाटी पब्लिक पार्टी हाउस संचालन गर्नु भयो । त्यस पछि वि.स. २०६४ साल देखि हालसम्म ललितपुरको बागडोलमा बेखाज पार्टी भेन्यु चलाई रहनु भएको छ । यस पार्टी भेन्युका संरक्षक एवं संस्थापक श्री बेखा महर्जनज्यूको निधन वि.स. २०६४ सालमा भयो ।